حلّت الفنانة هنا الزاهد ضيفةً على برنامج "الحكاية" الذي يقدّمه الإعلامي عمرو أديب على قناة mbc مصر، حيث كشفت عن موقفها من الحب، وهل من الممكن أن تخوض تجربة الزواج مرة أخرى، وطريقة تعاملها مع المعجبين.
كما تحدثت الزاهد عن مشوارها الفني وأعمالها المقبلة، وأنها دخلت مرحلة جديدة في حياتها الشخصية والمهنية، مشيرةً الى أنها أصبحت أكثر وعياً في اتخاذ قراراتها.
وكشفت الزاهد عن موقفها من المعاكسات، قائلةً: "أنا مش بتعاكس في الشارع، بس في حياتي فيه ناس بتحاول، لكني ما بسمحش لحد يتعدّى حدوده. أوقات بيكون الكلام لطيف مش أكتر".
وكشفت مازحةً عن موقف طريف تعرّضت له بالقول: "مرة حد كلّمني في شغل، بس صوته ما عجبنيش خالص، كنت أغريسف جداً، صوته كان عامل كأنه نايم فقلت له: إنت نايم ولا إيه؟ فصدّيته على طول".
وعن تعاملها مع الإعجاب، قالت هنا بصراحة: "لما أكون معجبة بحد، أتعامل معاه وحش جداً، علشان ما أظهرش له اللي جوايا، مش ببيّن إعجابي أبداً. ومعنديش وقت للتسلية، الوقت كله للشغل".
هنا الزاهد: لا أفكر في الزواج حالياً وذهبت لطبيب نفسي
وأوضحت الزاهد أنها تركز في حياتها المهنية حالياً ولا تفكر في الزواج، قائلةً: "مبفكرش في الجواز دلوقتي، مركّزة في الشغل. لكن طبعاً أي بنت بتحلم يكون عندها عيلة وأطفال... إنما أنا مش مرتبطة عاطفياً بأي شخص الفترة دي".
وعن أصعب أدوارها، كشفت هنا عن كواليس شخصية "السيكو" في مسلسل "إقامة جبرية" إذ قالت: "دي كانت شخصية معقدة جداً، وعلشان أتقنها رُحت لطبيب نفسي مرة واحدة في حياتي، كنت عايزة أفهم الحالة دي كويس وأعيشها صح".
كما كشفت الزاهد عن دخولها مرحلة جديدة في حياتها الشخصية والمهنية، مشيرةً الى أنها أصبحت أكثر وعياً في اتخاذ قراراتها، حيث قالت: "لازم أحسب خطواتي في شغلي وحياتي الشخصية، وحقيقي اختلفت عن زمان، بقيت أحسبها أكتر وحاسة إني عقلت شوية في العامين الأخيرين".
وأضافت أنها تعلّمت الكثير من تجاربها السابقة، موضحةً: "اتعلمت إني ما أثقش في الناس كلها، بقيت جافة المشاعر شوية، الأول كنت حسّاسة أوي وباحس باللي قدامي أكتر من نفسي".
وأشارت الزاهد الى أنها كانت في الماضي تتحمل مشاعر الآخرين على حساب راحتها، قائلةً: "كنت دايماً شايلة هم اللي قدامي أكتر من نفسي، لكن دلوقتي بقيت أنا بس، وبافكر في نفسي وبس، وبقيت أنانية بمعنى إني بحافظ على نفسي".
هنا الزاهد تكشف تفاصيل موقفها مع أمير كرارة
وروت هنا الزاهد موقفاً طريفاً من طفولتها، قائلةً: "وأنا صغيرة كنت في استوديو مصر، وكان أمير كرارة بيقدم برنامج "مين بيقول الحق"، وقعدت على حجره وأنا طفلة... الصورة دي قديمة جداً، ونزلتها مؤخراً، وأمير قال لي: أوعي تنشري الصورة دي قبل الفيلم علشان فيلم "الشاطر" كده هيتدمّر، لكني نزّلتها قبل الفيلم، والحقيقة الفيلم كسّر الدنيا".
كما تحدثت عن خططها الفنية بعد مسلسل "إقامة جبرية" الذي عُرض أخيراً، فقالت: "الناس شافتني في المسلسل إني أقدر أعمل كوميدي وتراجيدي، لكن نفسي الفترة الجاية أعمل دراما ورومانسية أكتر، أمي كانت خايفة جداً من دوري في "إقامة جبرية"، خصوصاً إن عيني كانت مختلفة ومتغيرة لأني كنت عايشة الدور بجد".
ورداً على سؤال عمرو أديب: هل الارتباط بفتاة جميلة مشكلة؟، قالت هنا الزاهد: "الارتباط بواحدة حلوة مشكلة لو هي مش كويسة أو مش مخلصة، لكن القلق الزايد من الراجل على الست الحلوة سببه انعدام الثقة عنده".
وعن أجواء العمل في الوسط الفني، قالت هنا الزاهد بجرأة: "فيه ممثلين كبار حواليهم ناس بيطبّلوا ليهم، وأنا ما بحبّش المجاملات، فيه ناس مزيفين كتير جداً أنا عارفاهم، ومش بعرف أتعامل مع حد مش على طبيعته".