كشفت الفنانة روجينا تفاصيل تعاونها الأول مع ابنتها مايا أشرف زكي كمخرجة، حيث طلبت منها أن تُخرج مسلسلها الرمضاني المقبل، موضحةً أن ابنتها لم تعتمد على الوساطة كما يعتقد البعض.
وقالت روجينا في تصريحات صحافية على هامش تواجدها في "مهرجان الجونة السينمائي": "أكتر حاجة أسعدتني أن الناس كلها فرحانة لمايا، هي تستحق وخطوتها تأجّلت أوي وكل المخرجين والممثلين اللي اشتغلوا معاها قالوا لها لازم تاخد الخطوة، ولكن هي كانت عايزة تخلّص كل حاجة قبل ما تاخد خطوة الإخراج، يعني هي خلصت المعهد وعملت أفلام كتير، واشتغلت مع أبوها الروحي رامي إمام وعادل إمام ونادين خان وأحمد الجندي، دول مدارس مختلفة، وسافرت لندن وعملت مشروعها وكان الأول هناك".
وتابعت روجينا: "مايا بتصوّر فيلم مشغولة فيه وظروفه أنها لازم تصور في فصول معينة من السنة، قلت لها أبوس إيدك تعالي أعملي مسلسلي، قالتلي لأ مش عايزة أشتغل معاكي أنا قاعدة على فيلمي، قلت لها علشان خاطري لأني عارفة أنها لو عملت الفيلم أنا مش هشوفها تاني مش هتخرجلي في حياتي، لأنها مبتحبش وعندها مبدأ (مش عايزة أشتغل مع أبويا ولا أمي ولا عمّتي)".
روجينا عن دخول ابنتها عالم الإخراج: "اللي يقول بالواسطة يقول..."
وعن اعتقاد الجمهور بأن ابنتها مايا دخلت عالم الإخراج الفني من خلال الوساطة، قالت روجينا: "اللي يقول بالواسطة يقول... أهم نجوم دلوقتي مسيطرين على الشاشة أبناء فنانين زي كريم عبد العزيز وأحمد السعدني ومحمد عادل إمام، كلهم نجوم صف أول، لأنهم اتولدوا في هذه البيئة، ولاد الدكتور بيبقوا دكاترة وولاد المهندس بيبقوا مهندسين، وأنا اتحايلت عليها كتير وادعوا لنا".