كشف الفنان نادر أبوالليف عن معاناته المستمرة مع خلافات الميراث داخل أسرته، مؤكدًا أن القضية ما زالت عالقة في المحاكم منذ أكثر من 10 سنوات.
وأوضح الفنان أبوالليف، في منشور عبر حسابه على فيسبوك، قائلًا السلام عليكم.. عايز أعرف ليه الناس ضمايرها ونفوسها وأخلاقها وتربيتها إتغيرت من جواها، كل واحد بقي يهمه نفسه فقط لا غير ومش مهم أي حد على وجه الأرض.. كله بيقول يا نفسي.
وأضاف حتى للأسف الشديد أخوك ابن أمك وأبوك اللي نازل أنت وهو من رحم واحد ومتربيين في بيت واحد عايز ياكلك ويدوس عليك وياكل ورثك، ليه خلاص مبقاش في ضمير ونخوة ورجولة ودين ومبادئ وأخلاق ومراعاة للدم اللي بينك وبينه.
وتابع الفنان حديثه عن معاناته مع قضايا الميراث، قائلًا بقالي أكتر من عشر سنين دايخين في المحاكم علشان نبيع شقة ورث وكل واحد ياخد نصيبه بما يرضي الله، وللأسف المحاكم والقضايا إللي زي دي بتاخد سنين طويلة.
وأشار إلى أن الخلافات أثرت عليه نفسيًا، مضيفًا نفسي يفوق ويحس ويعرف إننا إخوات وعمر الدم ما يبقى مية، لكن هو للأسف الشديد ولا بيفكر ولا يهمه ولا شايف ولا سامع غير نفسه ومصلحته.
واختتم أبوالليف رسالته بمناشدة للمسؤولين للتدخل وحل الأزمة، قائلًا وأتمنى أي مسؤول أو أي حد يرد عليا بحل سريع ينهي موضوع الورث اللي هو حقي ومش عارف آخده من أخويا، وربنا يهديه لنفسه ويتقي ربنا ويعطي كل واحد حقه بما يرضي الله.